راجعين للفول من تانى

راجعين للفول من تانى

جه الصيام وكل سنة وانتوا طيبين


ومفيش غير الفول الوجبة الرئيسية فى كل بيت

وهتاكله بالذوق او بالعافية هتاكله لانه ملوش منافس

فلو فى مرة كنت جعان ولقيت معدتك بتصرخ من الجوع ايه الحل ؟؟؟


اكيد مفيش غير الفول السحرى وجنبه شوية بذنجان اسود مخلل

زى اللى اكلته امبارح وهتاكله بكرة وبعده

ويا سلام لو معاهم كام قرص طعمية وشوية مخلل

وتروح تشتريهم من اى مكان طبعا سيبك من نوع الزيت اللى فى الفول

اوع تتجنن وتسال الراجل ده زيت ايه مش مهم

كل وانت ساكت ومش مهم البذنجان محشى بخلطة ايه

لان ممكن الخلطة دى لا يعلم بخطورتها انسان .


المهم سخن جنبهم شوية عيش من اللى انت شايلهم فى التلاجة للزمن

وكل لحد لما بطنك تتنفخ واصبر بعدها نصف ساعة علشان تعرف تمارس جزء

من حياتك الطبيعية وزى ما سمعت ان الفول بياخد 12 ساعة علشان يتهضم

اما قشرة الفول فهى لا تهضم على الاطلاق .


المهم حين تختلط كل تلك الاصناف فى بطنك سوف تلاحظ الفوائد فورا

منها انك سوف ينتابك شعور ان الناس فى وادى وانت فى وادى اخر

عقلك قد تحجر وتوقف عن العمل ونبضات قلبك تعمل بسرعه ررررهيبه

سوف تنعزل عن المكان والزمان لا تفقه اى شئ مما يدور حولك

وكانك فى غيبوبه ساعتها عليك ان تسارع بتناول كوب من الشاى المغلى

حتى ينقطع نفسه ويصبح كالحبر يمكن الكتابه به وبعد تناول الشاى

سوف تجد نفسك مبتسما لا لشئ الا انك مبتسما .


وبعد مرور اربعه ساعات سوف تنتابك روح عدائية غريبه

تكاد بسببها تفتك بمن يلقاك لكن تلك الحاله لا تستمر كثيرا

حيث تنتابك حاله من السكون والرعب من لاشئ .


عندها تناول كوب شاى اخر وسوف ترى ما لم تراه عين من قبل

وتأتيك افكار غريبه تتصارع فى رأسك وخيالات تمر امام عينيك .


طبعا علشان المفروض كنت تاكل جرجير مع بقية الاكل

ولو كنت بتتعشى فول متنساش الجرجير علشان يرطب على معدتك

لانك بعدها هتروح فى غيبوبة قصدى هتروح فى النوم


وبالهنا والشفا


انتوا عارفين ان الفراعنة حرموا اكل الفول

( على فكرة الناس دول كانوا عباقرة قوى لحقوا نفسهم بسرعة

قبل ما يتعودوا على الفول ويتاثروا بيه وبعدين ييجى ناس من برة ويقولوا
على الفراعنة مش هما اللى بنوا الهرم دول مش عارف ايه مرة يقولوا انهم من
قارة اطلنطا ومرة تانية ان اليهود هما اللى بنوه )


لا ياجماعة الفراعنة هما اصحاب المجد كله

بس مكنوش بـياكلوا فول ده سر الحكاية


عموما حد يعرف المثل الشعبى اللى بيقول :-

" ان الفول فطار الامير وغدا الفقير وعشا الحمير "


انا مش متفق مع المثل ده لان لو الامير فطر فووول المملكة هتضيع كده


وفى مثل تانى بيقول :-

" اكفى القدرة على فمها تطلع البنت لامها "


يعنى للدرجة دى بيضحوا بقدرة كاملة من الفول علشان البنت تطلع لامها

عنها ما طلعت لامها خليها مكانها وبعدين اللى يَطلع امها فوق ... مش فاهم ؟؟



على العموم الفول مش وحش قوى كده ده مسمار البطن

زي ما بيقولوا

بس انت ابقى خد بالك متاكلوش وانت رايح الامتحان

او بتعمل حاجة عايزة تشغيل مخ



وان خلص الفول انا مش مسئول وبالهنا والشفا


ياجماعه متتضايقوش من الفول

لا تشكو للناس جرحا ً أنت صاحبه .... لا يألم الجرح إلا من به ألم






---------------------------------------------------------