اللى عايز يشترى كمبيوتر

النهاردة هنبدأ مع بعض رحلة أو حلقات هنكملها ان شاء الله مع بعض وهى دليل الكمبيوتر الجديد بمعنى ان اللى عايز يشترى كمبيوتر يقدر يتابع الحلقات دى ويتعرف على مكونات الجهاز حتة حتة ويقدر ان شاء الله يختار أنسب شىء ليه لما يعرف كل حاجة فى الجهاز.

نبدأ على بركة الله

الجهاز من الخارج ينقسم الى حوالى 5 قطع ضرورية وهى :
1- الكيسة Case ودى اللى فيها أجزاء الكمبيوتر
2- الشاشة Monitor ودى شاشة العرض
3- لوحة المفاتيح Keyboard
4- الفارة Mouse
5- السماعات Speakers
دول لا يخلو منهم أى جهاز كمبيوتر فى أى بيت

فى الحلقة الأولى دى هنتناول الحاجات الخفيفة
أ- لوحة المفاتيح :
ودى مفيهاش كلام كتير لأنها موجودة بمليون شكل وصورة وسعر بس فى حاجات تراعيها فى اللوحة لما تيجى تشترى وهى :
- وجود أزرار ملتيميديا يعنى لخفض الصوت والنت والتحكم فى الميديا بلاير لأنها فعلا بتساعد كتير
- تكون الكيبورد من واجهة USB أفضل من PS/2 لأنها أسرع وأفضل
- الكيبورد تدعم العربية وتكون الحروف مكتوبة بالعربى ع الأزرار
- نيجى بقى للتقيل والمهم هو انك ما تسترخصش كيبورد وتفرح بأم 15 أو 20 جنيه لأنها بتبقى خفيفة وبتبوظ بسرعة ومن الآخر كيبورد محترم لا يقل عن 50 جنيه ووالله مش خسارة لأنها بتعيش والأنواع اللى أوصى بيها :
1- Microsoft
2- AOpen
3- A4Tech
4- Tiger
5- Gigabyte
دى أنواع موجودة فى السوق وأسعارها معقولة بتبدأ من 40 أو 50 جنيه ولغاية 300 أو 400
وعموما فى أنواع كتير تانية كويسة بس دول مجربين والمهم وانت بتشترى تتأكد انه تقيل وزرايره حرة الحركة وخفيفة ومش هتعمل صوت

ب- الفارة
دى مافيهاش كلام بس تفضل طبعا من نوع الماوس الضوئى Optical Mouse يعنى من غير بلية من تحت عشان مش ناقصة خنقة و مشاكلها كتير
ويكون الماوس انسيابى متناسب مع وضع الكف عليه من فوق ويكون فيه بكرة Scroll Mouse عشان بتريح فى شغلها
أنواع مقترحة:
1- Microsoft
2- LG
3- Genius
4- A4Tech
وبرضه هنقول فى أنواع تانية بس تبص عليها قبل ماتشترى وتعاينها كويس

انتهت الحلقة الأولى وان شاء الله هنكمل سوا

الحلقة التانية

على بركة الله نبدأ الحلقة التانية ودى هيكون موضوعها سماعات الكمبيوتر هو الموضوع يبدو صغير بس فى الحقيقة انه مهم نعرف عنه شوية حاجات ناس كتير لا تهتم بها .
طبعا السماعات بقت جزء مهم لا يمكن التخلى عنه فى أى جهاز حاليا نظرا للاتجاه اللى بدأنا نسلكه من جعل الكمبيوتر أداة ترفيهية رقمية يعنى بالعربى كدة
- ألعاب وعاوزة سماعات حلوة عشان تستمتع بالمؤثرات اللى فيها وتعيش معاها
- اغانى ودى يعنى مفيش جهاز يخلو منها
- أفلام ودى ماشاء الله الأجهزة مابقتش ملاحقة عليها
- طبعا الوسائط الدينية الصوتية والمرئية
- كمان الناس اللى ممكن تعمل شغل وسائط متعددة زى أفلام فلاش وثرى دى

طيب نختار السماعة على أساس ايه ؟
مبدئيا أعتقد ان كلنا بقينا بنشترى صب ووفر وده للى ميعرفش - وماعتقدش ان فى حد مايعرفش - هو عبارة عن وحدة سماعة كبيرة ودى اللى بتتوصل بالجهاز وبيتوصل فيها بعد كدة السماعات الصغيرة وميزة الحكاية دى انك توصل كذا سماعة بالجهاز ( حتى 7 سماعات ) عن طريق جهاز واحد اللى هو (وحدة الصب ) يعنى بتوفر توصيل وطبعا الصب الضخم ده يتمتع بقوة فى مؤثراته الصوتية(BASS, TREBLE) يعنى الدبدبة والسكسكة والذى منه بمعنى أدق ممكن تعمل بيه فرح
طيب ماشى هنجيب صب , نعرف قوته منين يعنى كام وات ؟؟؟؟
تلاقى الصب من دول مكتوب عليه 3500 وات ولو شغلته وخرجت برة الأودة ماتسمعوش يبقى نصب ده ولا ايه ؟
لأ ياسيدى السماعة لها مقاسين ايه هم ؟
الوات الأول اللى هو P.M.P.O وده اللى بيبقى كبير قوى يعنى ممكن تلاقيه لغاية 7000 وات ويمكن أكتر فى الحاجات الكبيرة
الوات التانى وده الفعلى بس ماحدش بياخده فى الاعتبار وهو RMS وده بقى القوة الحقيقية للسماعة وده بيبقى صغير قوى يعنى تلاقيه مثلا 40 أو 50 ولو لقيت 100 تبقى باشا بس ده طبعا فى السماعات بتاعتنا اللى فى البيت يعنى

فى حاجة أخيرة نتكلم عنها قبل مانقفل الحلقة وهى انك عشان تتمتع بالصب اللى انت جايبه صح لازم تجيبله كارت صوت على قده يعنى
لو جايب صب 2,1 (صب وسماعتين) يركب على كارت صوت عادى
طيب لو جايب صب معدى يعنى 7,1 تركبه على كارت صوت بيلت ان ؟
لأ , بلاش بخل بقى عشان تتمتع بالقوة اللى انت جايبها لازم تجيبله كارت 7,1 لايف . والغاوى ينقط بقى

ملحوظة : طبعا البيلت ان مش وحش لأن فى البورد الجامدة الجديدة تلاقى فيه كروت صوت لغاية 7,1 يعنى تشيل أجدع صب بس أنا باتكلم ع العموم يعنى

طيب عشان نخلص بقى هارشح لكم كام نوع زى كل مرة عشان طولت عليكم :
1- Creative وده الملك بس اتأكد من ملصق الوكيل عليه
2- Genius
3- Phantom
4- Tiger
دى يعنى الحاجات الجامدة بتتكلم فى 150 وانت طالع غيركدة الحاجات الصغيرة بقى تنزل تتفرج وتنقى اللى انت عاوزه بس تختبرها وتعلى الصوت ع الآخر وتتأكد ان مافيش هزة فى الصوت لما يعلى ولا نغبشة لما تخبط ع السماعة من برة وتكون تقيلة كدة وبنت حلال
الحلقة الثالثةنبدأ الحلقة التالتة ونأسف على التأخير
ان شاء الله موضوعنا النهاردة هنختم بيه الكلام السهل يعنى كل حاجة برة الكيسة
وطبعا الموضوع عن الشاشات أو المونيتور ( Monitors )
الموضوع مافيهوش كلام كتير قوى لأنه مش محتاج بحث أو خبرة انما هنقول الكلمتين اللى فيهم الفايدة بسرعة
طبعا لما تيجى تشترى شاشة متسألنيش ال 15 ولا ال 17 بوصة أحسن ؟؟
كل واحد ومزاجه وطبعا - كاشاته -
يعنى مسألة المقاس دى ترجع لمزاج حضرتك انما اللى يهمك فى الشاشة الوضوح الأقصى بتاعها Max. Resolution وده يعنى لو هتستخدم كارت نضيف وهتشتغل شغل جرافيك وثرى دى وفيديو يبقى محتاج مونيتور وضوحه عالى يصل الى 1024* 1280 وكل الشاشات اللى فى السوق حاليا تدعم الوضوح ده ويمكن أعلى كمان بس المشكلة هتبقى لو هتجيب شاشة مستعملة أو قديمة فخللى بالك من النقطة دى وده طبعا هيبان فى الشاشات القديمة وخصوصا لما ناس بتيجى تسطب اكس بى يقولك الشاشة فصلت لأنها لا تدعم وضوح ومعدل تنقية عالى

حاجة كمان ان الشاشة كلما كانت أقرب للتسطيح طبعا كانت أفضل لأن الأشعة الناتجة منها بتقل وبالتالى حماية أفضل للعين يعنى هتلاقى الفلاترون من ال جى مثلا أغلى من العادية ودى هى فلات ال جى بس طبعا أغلى شاشة هى البلازما LCD اللى بتبقى رفيعة قوى وشاشتها سودا ودى الاشعاع الخارج منها صفر بس عيبها انها بتتأثر باضاءة المكان والرؤية بتبقى صعبة كلما بعدت عنها أو وقفت بزاوية يعنى لازم تبقى قدامها عشان تشوف

يبقى الأفضل الشاشات المسطحة وبعدين LCD وأقلهم العادية بس ماحدش يخاف منها يعنى مش هتجيبلوا العمى انما احنا بنقول الوقائع وعموما كل ده بيتوقف أولا وأخيرا على امكانياتك المادية فقط

طبعا الشاشة ياريت يكون فيها لوحة أزرار جيدة للتحكم فى الألوان والاضاءة وبعضها بقوائم لغة عربية كمان

وأرجع و أقول الشاشة اختيارها فى الاول والآخر يرجع لامكانياتك ومزاجك

عشان نخلص بقى نرشح لكم كام نوع كدة والله الموفق
1- Samsung وده يعتبر الأفضل فى سعره بالنسبة لامكانياته ومش مضروب
2- BENQ
3- LG
4- SONY
5- PHILIPS
طبعا يوجد أنواع أخرى فى أقل وفى حاجات فى العليوى قوى انما انا باتكلم عن المتوسط

كدة خلصنا الحلقة التالتة وان شاء الله الجاى هيبقى التقيل اللى فيه كلام وحكاوى كتيييييييييييييير لأننا هنخش فى الكيسة يعنى الكمبيوتر الأساسى فخدوا نفس واجهزوا
الحلقة الرابعةفى الحلقة دى هنبدأ فى الكيسة واحدة واحدة وطبعا هنبدأ بالكيسة نفسها يعنى الصندوق اللى هيبقى فيه كل حاجة
الكيسة كتير مننا ما بيهتمش بيها الا فى الشكل بس يعنى يختار شكل ومايهمش أى حاجة تانية بس ده غلط لأن فى حاجات فى الكيسة ياريت نراعيها قوى قوى

أول حاجة لها علاقة شوية بالشكل يعنى ترجع لمزاجك برضه وهى الهاند أو اليد اللى بتبقى فى الكيسة من فوق ياريت تكون موجودة لأنها بصراحة ضرورية فى نقل الكيسة - واسأل مجرب- لأن شيل الكيسة على قلبك وحش يابنى والله
بس وانت بتجيبها تتأكد ان اليد دى مشطوفة كويس يعنى مش بعد ما عملوها سابوا البروز البلاستيك الزيادة فيها لأنك وانت شايلها مليانة وتقيلة اليد دى كفيلة بانها تشرح ايدك وماحدش يستخف بالكلام ده
طيب خلصنا من اليد , ايه تانى ؟؟ تفتح الكيسة وتتأكد من ان الغطا نضيف وأطرافه معدولة وبيركب ويتخلع بسلاسة وبعد كدة تضرب عينك فى الكيسة لازم تحس انك شايف ملعب كورة قدامك يعنى تختار كيسة ضخمة بمعنى الكلمة لأن الكيسة لازم تبقى واسعة من جوة عشان تعرف تشتغل فيها مش تيجى تركب البوردة تحتاج حد يطلعك عشان ايدك اتزنقت
طيب اللى بعده , المادة اللى مصنوع منها الكيسة واوعى تصدق ان فى كيسة استانلس - من اللى بتشوفهم - عشان لو استانلس تمنها بأمر الله هيخش فى ال600- 700 جنيه مبدئيا ( على فكرة فى كيسات بتوصل 1500 جنيه بس مش موضوعنا )
يعنى كله صاج وفى ألمونيوم وده أحسن المهم ان السمك بتاع الصاج يبقى جامد يعنى مش تزقها بصباعك تروح وتيجى معاك زى المنديل الورق انما لازم تكون سميكة وماسكة نفسها كدة وبعدين لازم تكون اما مجلفنة يعنى مدهونة بلون كدة زى الرمادى وده بيبقى فى الأنواع الرخيصة أو تكون من ألمونيوم نضيف لونه فضى فاتح وبيلمع وفعلا شبه الاستانلس ودى بتبقى حلوة قوى
طيب خلصنا الشكل نخش ع اللى جواها بقى , الكيسة لازم تكون فيها 4 أماكن 5,25 بوصة ودى اللى بيركب فيها السى دى روم والموبايل راك ويكون ع الأقل مكان فلوبى وأماكن للهارد ديسك ودى بتبقى تحت الفلوبى وتكون كفاية عشان فى كيسات بخيلة يعنى لازم عالأقل مكانين
الكيسة يكون فيها الآتى بقى :
1- زرار باور ويكون نضيف مش بلاستيك تعبان وتدوس عليه وتتأكد من سلاسته فى الشغل يعنى يطلع وينزل صاروخ مش يعلق
2- زرار ريستارت ونفس الكلام زى اللى فوق
3- لمبة باور
4- لمبة هارد
5- سماعة كيسة ودى مهمة عشان تسمع تحذير البوردة
6- يا حبذا يكون فيها مروحة أو أكتر من جوة عشان التهوية تبقى تحفة
طبعا الحاجات دى تبص عليها وتتأكد من الجاكات بتاعتها وانها مكتوب عليها كل حاجة عشان مش هنقعد نجرب ونحتاس
بعض الكيسات كمان بيكون فيها USB وهيدفون ومايك بس يعنى غالبا مالهومش لازمة

كل ده عمليا 20 % من أهمية الكيسة , انما المهم بقى والباشا الكبير جوه هو مصدر الطاقة أو الباور سبلاى Power Supply
مستقبل الكمبيوتر وكفاءته تعتمد ع الأخ ده لأنه ببساطة هو المصدر الأساسى للطاقة , أولا يكون من نفس الخامة الجيدة بتاعة الكيسة , ثانيا يكون تقيل ودى مهمة عشان الترانس اللى جوه بيبقى تقيل وبرضه المروحة جوة تكون قوية ويكون ع الأقل خاااالص 300 وات فعلى ودى ترجع للنوع اللى انت جايبه لأن معظم اللى فى السوق ....... انتوا فاهمين
لازم الوات يكبر كلما عليت امكانيات جهازك وسرعته وخصوصا أصحاب كروت الشاشة PCI-Express لأنها بتسحب باور كتير لذلك يصل الوات الى 400-450 وات فعلى عشان الجهاز ما يتأثرش وبرضه البروسيسور ال LGA محتاج وات عالى وأرجع وأقول انك مش هتقدر تقيسه لأنه محتاج جهاز مخصوص يبقى أملك بقى فى الماركة , بس قبل ما قول ع الأنواع نقول الحاجات اللى هتحتاجها برضه من السبلاى وهى
1- ع الأقل 4 جاك باور عادى للهارد والسى دى روم
2- 1 جاك باور للفلوبى ديسك
3- بعض السبلاى الجيد يكون فيه باورات للهارد الساتا وبتبقى سودة وعريضة ومبططة

ننجز بقى ونقول ع الانواع اللى هنرشحها
1- Gamma ودى الحوت ومن أغلى الأنواع تبدأ من 250 جنيه بس بصراحة تستاهل لأن السبلاى بتاعها نضيف قوى ونوعه جاما برضه (تعرف السبلاى الجاما بانه بيكون مكتوب عليه hec بالأخضر من الجنب )
2- Jumbo نوع عادى بس نضيف وشغال
3- Premium
يعنى دى الحاجات اللى أنا جربتها غير كدة فده متروك ليك بقى تعاين وتدور زى مانت عايز والأنواع عندك ماتعدش بس أهم حاجة الباور سبلاى يا خوانا مهم جدا جدا
الحلقة الخامسةالحلقة دى هنتكلم عن اختيار اللوحة الأم أو المازر بورد Mother Board
ودى بلا شك أهم جزء على الاطلاق فى الكمبيوتر كله لأنها هى الأساس والباقى ممكن تتحكم فيه فيما بعد , على بركة الله
لازم الأول نعرف حاجات مهمة عن اللوحة الأم , وهى ان اللوحة الأم مش بتتعمل كلها فى شركة واحدة أو بمعنى أصح مكوناتها بتيجى من كذا مكان كالتالى :
1- اللوحة نفسها بما عليها من مقاومات ومكثفات بيتعمل فى الشركة المصنعة اللى هى صاحبة الماركة يعنى
2- معالج اللوحة أو الشريحة الرئيسية للبوردة ودى اللى بتحمل رقم الموديل زى 865 أو 945 ودى بتعملها 3 أو 4 شركات
3- كروت الصوت والشبكة بتعملها شركة (طبعا بنتكلم عن البيلت ان )
كدة يعنى كل حاجة بتتعمل فى حتة وتتجمع فى الشركة المصنعة للوحة وتخرجلك بالموديل بتاعها
طيب على أى أساس تختار لوحة ؟
حاجة من اتنين ومش هنقعد نقسم فيهم , يا اما انت راجل بتاع شغل وعايز تجيب جهاز شغل يعنى تكتب وتخزن بيانات وتشتغل نت ولو حتى صيانة ريسيفر فانت ممكن تجيب جهاز معقول بامكانيات بسيطة ويشتغل معاك فل ,
انما لو انت زى حالاتنا كدة مش عاتق الجهاز لعب وجرافيك ونت وأفلام وتحميل وبرامج تقيلة .....و...و....و.....
يبقى انت لازم تدفع بقى يا حلو يعنى من الآخر تجيب جهاز جامد عشان النص نص مش هيعمل كل اللى انت عايزه وساعتها تبقى لا طولت فوق ولا تحت
طيب خلاص نخش فى المواصفات بقى :
فى الحالة الأولى , راجل بتاع شغل يبقى تدور ع الآتى , زى ماتفقنا ان اللوحة عليها معالج أو طقم شرائح بيحدد موديلها وكل ما على رقم الموديل عليت قدرات اللوحة وامكانياتها بس انت بتاع شغل يعنى ممكن تجيب أى حاجة من اللى فى السوق , والموديل دلوقت يبدأ من 848 يعنى شريحة انتل أو اس آى إس 848 هتقضى معاك وممكن برضه تجيب 865 ولو عايز تعلى براحتك يا باشا بقى , اللوحة طبعا بتبقى ال جى اى دلوقت وممكن تجيب الكروت كلها بيلت ان فيها يعنى شاشة وصوت وشبكة وكل اللى تحتاجه لأنك مش هتحتاج لوحة صاروخ , طبعا الفتحات الإضافية اللى عليها بتبقى AGP 4x وممكن AGP8X كل ماتعلى الموديل وبيبقى عليها فتحات PCI لإضافة كروت الفاكس والصوت والدش والذى منه وانت مش محتاج أكتر من كدة أبدا , طبعا اللوحة اللى موديلاتها أقل من 915 تدعم ويندوز 98 وانت طالع وده مهم جدا جدا للى بيتعاملوا بالويندوز القديم لأن الشرائح الجديدة كل سنة وانتوا طيبين لم تعد تدعمه دعم كلى .....
نوع الشريحة زى ماتفقنا بيكون انتل وممكن إس آى إس وممكن فيا وأفضلهم طبعا انتل .
البوردة طبعا بيكون عليها 2 IDE لتركيب هارد وسى دى روم وعليها فتحة فلوبى ولو بتشتغل فى الدش لازم البوردة طبعا يكون عليها ع الأقل فتحة سيريال واحدة أو أكتر .....
طيب انت ياعم يا بتاع الشغل كدة خدت فكرة نرشحلك بقى كام بوردة عشان ننجز :
1- Gigabyte 848, 865 with intel chipset
2- MSI 865 with Intel chipset
3- ASUS
4- Soltek
5- FoxConn
طبعا البورد دى تدعم معالج انتل بس انما لو ليك مزاج فى AMD يبقى هتجيب بوردة بشريحة SIS أو VIA لأن مش معقول انتل هتعملهم بوردة
البورد دى بتبدأ من 350 جنيه وانت طالع
كدة خلصنا الغلبان بتاع الشغل نخش بقى ع الشغل المفترى
انت يا أخ ياللى هتفحت الجهاز شغل لازم تدفع عشان تلعب
طيب ناخدها بقى واحدة واحدة من جهة الشريحة فبأى حال من الأحوال لا ترضى بأقل من 915 لأن دى هى اللى هتديك أداء كويس مع الألعاب والبروسيسور ال LGA يعنى 915 , 945 , 955 وكله بتمنه بقى
المعالج طبعا عليها هيكون LGA ويكون الكارت اللى عليها بيلت ان كارت الشبكة مش هتحتاج أحسن من كدة وممكن الصوت يكون بيلت ان بس يستحسن يكون كارت 7.1 وراجعوا حلقة السماعات وعموما البورد الجديدة كلها عليها كروت صوت جامدة قوى
طيب بالنسبة للشاشة , من الآخر كدة لن ينفع البيلت ان لأنه مهما كان ممتاز لا يرقى لمرتبة الكارت المنفصل وبعدين البيلت ان بيأثر على أداء الجهاز لأنه بيشتغل على حساب الأداء لأنه بيستهلك امكانيات الجهاز لنفسه ( أنانى يعنى )
طيب الكارت مفصول ماتقوليش AGP بقى لأن كله دلوقت بقى PCI-Express وده طبعا سرعته وأداءه أحسن 100 مرة يعنى تكون الفتحة اللى ع البوردة PCI-Express وتكون عندك برضه فتحات PCI عادية ومن الجديدة للكروت الجديدة ودى بتبقى صغيرة قوى كدة
طيب البوردة برضه لازم تكون عليها بنوك رامات مايقلش عن 4 يعنى تحط 4 رامات وتكون تدعم ال DDR II ودى هى الجيل التانى والأسرع والباص بتاعها بيكون 533 ( باص الرام )
لو هتحتاج هارد ساتا برضه بيكون عليها منه وبيكون فيها فتحات USB وكل اللى انت عايزه بس خللوا بالكم كويس قوى ان البورد الجديدة 945 وما فوق استغنوا عن فتحة السيريال فى معظم الموديلات لذلك لن تنفع فى شغل الدش
وبعدين زى ماتفقنا لو هتجيب بوردة أعلى من 915 يبقى انسى أى ويندوز قبل اكس بى وكمان كروت الشاشة البيلت ان فى ال915 لازم اكس بى عشان تتعرف

أظن كدة انت عرفت انت هتجيب ايه يا باشا ؟؟؟
نقولك بقى على نوعين جامدين وربنا معاك
1- GigaByte
2- MSI
3- ASUS
4- ABIT
5- FoxConn
طبعا أنا بارشح أنواع شفتها وجربتها وبرضه هتلاقى أنواع تانية جامدة كتير زى ألباترون والأنواع كتير بس أنا بارشحلكم اللى جربته ولا يضير أبدا ان حد عنده بوردة عجبتك تجيب زيها طالما انت متأكد من كفائتها بس اوعى اوعى حد من التجار يضحك عليك ويقولك خد دى مالهاش حل بوردة صاروخية وبتفتح وتقفل لوحدها لأن العك فى البوردة ماينفعش لذلك ابعد عن اللى ماتعرفوش وغنيله ......
طبعا بالنسبة للشرائح أو معالج البوردة يفضل زى ماقلنا انتل أولا بعدين SIS وأخيرا VIA وخصوصا مع AMD يفضل شرائح ال VIA

أخخخخخخ, لا مؤاخذة باتمطع
الكتابة وجعت لى ضهرى وايدى انما فداكم ولو حد عنده استفسار فى أى حاجة يقول قبل ماندخل الحلقة الجاية وان شاء الله هتكون عن المعالج ......

---------------------------------------------------------